Gipasalig sa mga ahensya sa gobyerno ug mga pwersa sa seguridad sa Central Visayas nga andam na kaayo ang Cebu alang sa 48th ASEAN Summit ug mga kaubanan sa himuon tigum nga ipahigayon sa Mayo 7–8, 2026.
Sa press briefing nga gihimo didto sa Cebu Provincial Capitol kagahapon Abril 28, gipresentar sa nagkadaiyang ahensya ang ilang mga pagpangandam lakip ang seguridad, emergency response, transportasyon, turismo, panglawas, ug logistics.
Gipaabot nga mokabat sa 20,000 ka bisita ang moanhi sa Cebu, apil ang mga lider sa nasud, mga delegado, ug support teams gikan sa 11 ka miyembro sa ASEAN.
Si Gobernador Pamela Baricuatro, nga nangulo sa Cebu Provincial Organizing Committee, padayon nga nagmando og mga meeting aron masiguro nga kompleto ang ka-andam sa maong dakong kalihokan.
Sumala sa Police Regional Office-7, kapin sa 10,000 ka pulis ang ipahimutang sa nagkadaiyang lugar aron masiguro ang kalinaw ug kahapsay sa summit.
Nagpadayon usab ang convoy simulation isip praktis sa pag-abot sa mga delegado sugod Mayo 5.
Ang Armed Forces of the Philippines Visayas Command mipahibalo nga labaw sa 1,000 ka sundalo ang ipahimutang alang sa seguridad ug paspas nga responde sa bisan unsang insidente. Dugay na usab silang nangandam sukad pa sa 2025.
Sa bahin sa dagat, ang Philippine Coast Guard-7 magpabiling naka-alerto sugod Abril 30 hangtod Mayo 10 ug magbantay sa baybayon sa Mactan.
Ang Presidential Security Command mipahimutang usab og air ug naval assets, lakip ang fighter jets, aron masiguro ang kaluwasan sa mga visiting dignitaries.
Samtang, ang Department of Health-7 nagpatuman og Code Blue alert sa mga ospital sugod Abril 30 hangtod Mayo 12. Mokabat sa 400 ka health workers ug responders ang ipahimutang sa Cebu ug Bohol.
Ang Department of the Interior and Local Government-7 nagmando sa mga lokal nga gobyerno nga palig-onon ang seguridad sa tourist spots ug siguruhon nga limpyo ang mga dalan nga agian sa convoy.
Ang Department of Social Welfare and Development-7 nag-andam na usab og evacuation centers aron malikayan ang samok sa mga dalan. Ang Department of Energy nagsiguro nga stable ang supply sa kuryente sa mga lugar nga himuan sa summit.
Sa turismo, ang Department of Tourism-7 nag-andam og mga hotel sa Lapu-Lapu City alang sa mga delegado, lakip ang welcome lounges ug ASEAN information desks sa airport.
Giandam usab ang mga tour packages sama sa island hopping ug pagbisita sa mga iladong kan-anan.
Gipakita usab sa Department of Trade and Industry-7 ang suporta sa mga lokal nga negosyante pinaagi sa pag-display sa mga produkto nga hinimo sa Cebu.
Gipasalig sa mga otoridad nga adunay igo nga supply, ka-andam sa emerhensiya, ug mga plano batok sa posibleng kalamidad samtang gihimo ang summit.
Ang maong kalihokan giila nga usa ka dakong oportunidad aron mapakita sa kalibutan ang ka-andam sa Cebu isip host sa international nga kalihokan.
Source: Cebu Province PIO
I via Renante Socia Lada