Nagmalampuson ang operasyon batok sa usa lalaki nga tigbuhat og iligal nga armas sa Purok Torre, Barangay Lupa, lungsod sa Compostela, Sugbo, alas 5:30 sa hapon sa Mayo 29, 2025.
Ang suspek giila sa alyas nga “Eric,” 35 anyos, ug residente sa maong lugar. Base sa inisyal nga report sa Compostela Municipal Police Station, ang operasyon gihimo human nakadawat og impormasyon ang kapulisan gikan sa usa ka nagpakabana nga residente nga adunay pabrika sa ilegal nga armas sa maong dapit.
Sa operasyon, napalitan sa poseur buyer ang suspek og usa ka caliber .357 revolver nga walay serial number, nga nagmatuod sa aktuwal nga pagpamaligya sa ilegal nga armas. Human niini, dali siyang gidakop.
Sa pagsusi sa buhatan sa suspek, narekober sa mga otoridad ang ubang pang mga armas ug kagamitan sa pagbuhat niini.
Sumala sa kapulisan, nga dugay na nila gi-monitor ang suspek ug gihilom lang sa komunidad ang maong operasyon hangtod nga adunay nakahukom nga isumbong kini sa mga otoridad.
Ang suspek karon anaa sa kustodiya sa Compostela PNP ug giandam na ang kaso nga ipasaka batok kaniya ilawom sa Republic Act 10591 o Comprehensive Firearms and Ammunition Regulation Act.
Padayon ang imbistigasyon aron masuta kung adunay mas lapad pa nga grupo ang nalambigit sa pagpamaligya sa armas sa lalawigan sa Cebu.
I via Renante Socia Lada