Dako nga kadaugan batok sa iligal nga drogas ang nakab-ot sa kapulisan sa Central Visayas sa tibuok bulan sa Pebrero 2025, diin nakasakmit sila og shabu ug marijuana nga mokabat sa kantidad nga PhP78.7 milyon, base sa taho sa Police Regional Office 7 (PRO7).
Sa 683 ka operasyon nga ilang gihimo, nasakmit ang 11,587.64 gramos nga shabu nga gibana-banang nagkantidad og PhP78,795,952.00. Dugang pa, nasakmit usab ang 20.4 gramos nga uga nga dahon sa marijuana ug 700 ka buok tanum sa marijuana nga nagkantidad og PhP142,454.00.
Matod pa, tungod sa walay puas nga kampanya sa PRO7 batok sa iligal nga drogas, 772 ka mga suspetsado ang nadakpan, diin 48 niini high-value targets, 529 ka street-level offenders, ug 195 ang bag-o pa lang natumbok nga mga personalidad.
Gipasiugda ni PBGen Redrico Maranan, Regional Director sa PRO7, ang dakong papel sa komunidad sa pagpakig-alayon sa kapulisan, nga nakatabang pagpalig-on sa ilang operasyon.
“PRO7’s unwavering response to the illegal drug trade demonstrates our firm determination to eradicate these threats. I take pride in the commitment of my officers, who tirelessly pursue those responsible for these operations and ensure a safer, more secure Region 7,” segon ni PBGen Maranan. (Renante Socia Lada)
(Source: PRO7-PIO)