Malampusong nasakmit sa mga awtoridad sa Central Visayas ang 316 ka nagkadaiyang pusil sulod sa tibuok bulan sa Pebrero, base sa report sa Police Regional Office 7 (PRO7).
Gipasiugda ni PRO7 Regional Director PBGen Redrico Maranan nga kini nga operasyon usa ka lig-on nga pagpamatuod sa ilang paningkamot sa paghimo og mas luwas nga palibot pinaagi sa pagpahunong sa hulga nga dala sa mga dili rehistradong armas.
Matod pa, gikan Pebrero 1 hangtod 28, 2025, 316 ka pusil ang nakumpiska sa nagkalain-laing operasyon sa PRO7, lakip na ang 11 ka eksplosibo ug 683 ka bala. Ilawom sa Oplan Katok, 138 ka managlahing pusil ang nasakmit.
Ang maong mga operasyon misangpot usab sa pagdakop sa 143 ka indibidwal gikan sa 313 ka operasyon nga gihimo sa tibuok rehiyon.
Dugang pa niya, dako ang papel sa panag-uban sa kapulisan ug sa komunidad aron mapadayon ang usa ka luwas ug malinawon nga Rehiyon 7. (Renante Socia Lada)
(Source: PRO7-PIO)