Nagmalampusan ang kampanya batok sa ilegal nga drogas sa Cebu City Police Office (CCPO) ubos sa pagpangulo ni Acting City Director PCOL Enrico E. Figueroa human sa nasakmit sa gipahigayon nga buy-bust operasyon nga misangpot sa pagkasikop sa usa ka high-value drug suspek ug pagkasakmit sa PHP 4.8 milyon nga kantidad sa gituohang shabu.
Ang operasyon nga planado pag-ayo gipahigayon sa Sitio BSJCO, Barangay T. Padilla, Cebu City, niadtong Abril 3, 2025. Kini gilusad sa Station Drug Enforcement Unit (SDEU) sa Parian Police Station 1, nga pinangulohan ni PMAJ Marvin B. Fegarido, nga adunay koordinasyon sa Philippine Drug Enforcement Agency (PDEA) – 7.
Nasakmit ang gibana-banang 715 gramos sa gituohang methamphetamine hydrochloride o “shabu,” lakip ang buy-bust money ug sling bag nga gigamit sa transaksyon.
Ang nadakpan nga suspetsado, usa ka 35-anyos nga lumulupyo sa Sitio Kalubihan, Barangay Guba, Cebu City, gilista isip usa ka high-value individual sa drug watch list. Siya kasamtangang gibalhog sa Parian Police Station 1 ug mag atubang ug mga kaso ilawom sa Sections 5 ug 11 sa Article II sa Republic Act 9165 o ang Comprehensive Dangerous Drugs Act of 2002.
Ang tanang nakumpiskang ebidensiya gidala na sa Cebu City Forensic Unit 7 alang sa dugang nga eksaminasyon.
Gidayeg ni PCOL Figueroa ang dedikasyon ug kakugi sa mga nag-operate nga yunit, ug iyang gibutyag ang padayon nga paningkamot sa CCPO aron mapakgang ang ilegal nga drogas sa Cebu City. Iyang gipasiugda nga ang CCPO nagpadayon sa pagpasiugda sa mga inisyatiba sa Police Regional Office 7 batok sa kriminalidad.
Kini nga operasyon basi sa nag-unang programa sa Police Regional Office 7, nga pinangulohan ni Regional Director PBGEN Redrico A. Maranan, nga nagpunting sa pagpakusog sa presensya sa kapulisan, pagtuman sa paspas nga pagtubag sa emerhensya, ug pagpatuman sa mga estratehiya nga naglikay sa krimen sa tibuok Central Visayas.
Source: CCPO
I via Renante Socia Lada
#rpndykccebu