Anaa sa kritikal ang kahimtang sa usa ka babaye human kini gipusil sa iyang kaipon sa Barangay Polog, Consolacion, Cebu pasado alas 3:30 sa hapon, Abril 4, 2025.
Ang biktima giila nga si Leslyn Romero Minoza, 44-anyos, residente sa Cabangahan, Consolacion. Samtang ang suspek mao ang iyang kapuyo nga si Gaudioso Canoog Jr., 35-anyos, nga nagpuyo sa lugar diin nahitabo ang insidente.
Base sa inisyal nga imbestigasyon sa kapulisan, nagkabangi ang magkapuyo nga misangko sa kasuko sa suspek. Diin kini nikuha og armas ug kalit nga gipusil ang biktima, human sa krimin misibat ang suspek palayo sa maong lugar.
Gidala dayon si Minoza sa pinakaduol nga tambalanan aron matambalan ang iyang mga samad.
Gipahigayon na karon ang hot pursuit operation sa mga otoridad aron masikop ang suspek ug manubag sa krimin na iyang gihimo. Padayon pa usab ang imbestigasyon sa kapulisan sa motibo sa pagpamusil.
I via Renante Socia Lada