Nagbilin og P1.5 million na danyos ang nahitabong sunog didto sa Sitio Atisan, Barangay Cansojong, siyudad sa Talisay.
Ang alarma sa sunog nadawat sa Talisay City Fire Station alas 11:14 sa buntag, Marso 19, 2024 na gisaka sa ikaupat na alarma og na fire-out pagka alas 12:30 sa udto.
Sa FB page post ni Talisay City Mayor Samsam Gullas gi bana-banang kapin sa gatos ka mga balay ang apiktado sa maong sunog.
Nasayran na ang sunog nagsugod sa panimalay ni Wilson Labuca na daling nikuyanap sa mga sikbit na pinuy-anan.
Ang kabomberohan padayon pang nagsusi sa maong sunog kung unsay hinungdan niini.
Samtang ang kagamhanan sa siyudad sa Talisay nihimo gyud dayon og lakang sa maong aksidenti sa sunog diin nipadala dayon sila og tabang sa mga biktima.
Ang City Social Services sa siyudad sa Talisay nihatag og mga pagkaon ug niatiman sa mga biktima sa sunog na gipahiluna sa Gymsa maong Barangay.
Gi proseso na usab ang financial assistance para sa mga apiktadong pamilya aron hinay-hinay silang makabangon sa maong trahediya. (Renante Socia Lada)