Usa ka dako nga operasyon batok sa ilegal nga drogas ang nagresulta sa pagkasakmit sa PhP1.3 milyon nga balor sa shabu ug pagdakop sa usa ka alyas “Pipoy” 29-anyos, wala’y trabaho nga lalaki sa usa ka buy-bust operation sa Purok 8, Barangay Bool, Tagbilaran City, niadtong Pebrero 8, 2025.
Ang operasyon gipangulohan sa Provincial Drug Enforcement Unit sa Bohol Police Provincial Office (BPPO), uban sa kooperasyon sa Tagbilaran City Police Station, Regional Intelligence Unit, ug Philippine Drug Enforcement Agency (PDEA). Nahitabo ang operasyon alas 9:28 sa gabii.
Sa nasangpit nga operasyon, narekober sa mga otoridad ang 200 gramos nga shabu nga nagkantidad og PhP1,360,000. Dugang pa, nakuha usab ang usa ka cellphone, buy-bust money, ug sling bag nga gigamit sa pagpangdad-an sa ilegal nga droga.
Si PRO7 Regional Director PBGen Redrico Maranan mipasidungog sa panaghiusa sa nagkadaiyang ahensya sa kapulisan ug nagpasalamat sa ilang paningkamot aron maprotektahan ang rehiyon batok sa drogas.
Gipasabot usab niya nga kini nga kalihokan nagpalig-on sa panaghiusa sa mga otoridad aron masiguro ang kahapsay ug kaluwasan sa komunidad.
Ang suspetsado kasamtangang gitanggong sa Tagbilaran City Police Station samtang nag-andam na ang mga awtoridad sa pagpasaka og kaso ubos sa Republic Act 9165 o ang Comprehensive Dangerous Drugs Act of 2002.
Source: PRO-7
I via Renante Socia Lada