Misaka na ngadto sa 72 ang kumpirmadong patay human sa kusog nga magnitude 6.9 nga linog nga miigo sa Bogo City, Cebu ug uban pang probinsya sa Central Visayas niadtong Martes, Setyembre 30, 2025. Kini ang gipagawas sa pinakabag-ong 6 a.m. report sa National Disaster Risk Reduction and Management Council (NDRRMC) karong Huwebes.
Gipadayag usab sa ahensya nga adunay 294 ka tawo ang naangol ug kasamtangang gi-validate ang mga report. Ang kasamtangang datos nagpakita nga 47,221 ka pamilya gikan sa 53 ka barangay sa rehiyon ang naapektuhan sa maong kalamidad. Mga 4,000 ka pamilya ang nagpabilin pa gihapon sa evacuation centers tungod sa peligro ug kadaut sa ilang mga balay.
Sumala pa sa NDRRMC, 597 ka mga balay ang nadaot sa linog. Sa ihap niini, 501 ka mga balay ang giila nga partially damaged samtang 96 ka balay ang totally damaged. Wala pa hinuon ma-finalize ang ihap sa kadaut sa mga imprastraktura ug agrikultura sa Central Visayas.
Padayon ang paningkamot sa mga ahensya sa gobyerno ug mga lokal nga LGU aron masiguro nga makadawat ug tabang ang tanang naapektuhan. Apil niini ang relief goods, temporary shelters, ug medical assistance para sa mga biktima. Gipahimangnoan usab ang publiko nga magmatngon sa posibleng aftershocks ug paglikay sa peligro.
Ang NDRRMC ug uban pang ahensya sama sa kapulisan, kasundalohan, ug mga volunteer groups nagtinabangay aron mapadali ang relief operations ug pagtabang sa mga apektado. Gipangayo usab ang kooperasyon sa tanan aron mas dali nga makabangon ang Central Visayas gikan sa dako nga kalamidad.
Source: NDRRMC
I via Renante Socia Lada