Si Gobernor Pamela Baricuatro nangulo sa mga opisyales sa Sugbo sa pag-uban kang President Ferdinand Marcos Jr. sa iyang pagbisita sa Bogo City aron personal nga tan-awon ang kahimtang sa mga biktima sa kusog nga magnitude 6.9 nga linog.
Gibisita mismo sa Presidente ang Yolanda Housing Village sa Barangay Polambato, usa ka relocation site alang sa mga biktima sa Supertyphoon Yolanda nga grabe usab naapektuhan sa linog. Sumala sa mga report, walo ka lawas ang nakalas gikan sa nagkadugmok nga mga balay sa maong lugar.
Kauban usab sa Presidente ang pipila ka mga miyembro sa iyang gabinete sama nila DPWH Secretary Vince Dizon, Tourism Secretary Christina Frasco, ug DSWD Secretary Rex Gatchalian. Ipakita niini ang hiniusa nga pagtinabangay sa nasyonal ug lokal nga pangagamhanan alang sa kaluwasan ug tabang sa mga Sugboanon.
Ang pagbisita ni Marcos ug Baricuatro nagpakita sa tinguha nga paspas nga matabangan ang mga pamilya nga nawagtangan ug puloy-anan, makadawat ug relief goods, ug mabalik ang kasiguroan sa mga apektadong lugar. Gipangayo usab sa Presidente nga palig-onon ang relief operations ug masiguro nga walay pamilya nga pasagdan.
Sa ilang mensahe, gi-awhag nila ang katawhan nga magpadayon sa pagtinabangay ug pag-ampo aron mas dali nga makabangon ang probinsya gikan sa trahedya. Gisaad usab sa gobyerno nga ipadayon ang suporta hangtod makabarog pag-usab ang mga apektadong komunidad.
I via Renante Socia Lada