Nasikop ang tulo ka mga suspetsado human nadakpan sa kapulisan atol sa “Oplan Bulabog” nga gihimo sa Barangay Suba, Cebu City niadtong gabii sa Marso 19, 2026.
Ang operasyon gipahigayon sa mga sakop sa Pasil Police Station 6 nga gipangulohan ni PCPT Giann Karlo M. Reyes ubos sa Cebu City Police Office (CCPO) nga gidumala ni Police Colonel George V. Ylanan.
Sa pagdakop, nasakpan ang tulo ka indibidwal nga nagkupot og mga pakete sa gituohang shabu. Ang nasakmit nga drogas adunay gibug-aton nga 0.45 gramos ug gibanabanang nagkantidad og ₱3,060.
Dali nga gi-dokumento ang ebidensya ug gipadala sa Regional Crime Laboratory Office 7 alang sa eksaminasyon, samtang adunay mga saksi aron masiguro ang husto nga proseso sa operasyon.
Sa pagkakaron, gipriso ang mga suspetsado sa Police Station 6 samtang giandam ang mga kaso batok kanila ilalom sa balaod kontra ilegal nga drogas.
Padayon ang kampanya sa CCPO batok sa ilegal nga drogas aron mapadayon ang kalinaw ug kaluwasan sa Cebu City.
Source: CCPO
I via Renante Socia Lada