Usa ka pulis ang gidayeg tungod sa iyang kaisog human naigo sa bala atol sa usa ka delikadong operasyon sa Sitio Boloc-boloc, Barangay Sangat sa San Fernando kagahapon Marso 21, 2026.
Ang nasamdan mao si Patrolman Kim Ceniza Villaraiza, 28 anyos, sakop sa Regional Mobile Force Battalion 7. Napusilan siya samtang nagtubag sa engkwentro batok sa usa ka armadong suspetsado nga nagbarikada sa balay. Ang operasyon kabahin sa hot pursuit human sa usa ka pagpamusil patay sayo pa buntag.
Bisan sa grabe nga pinusilay, nagpadayon si Villaraiza sa iyang pwesto ug mitabang sa pag-secure sa lugar aron malikayan nga maapil sa peligro ang mga residente. Dako ang iyang natampo sa pagpugong sa sitwasyon ug pagpanalipod sa kinabuhi sa sibilyan.
Dali siyang gidala sa Cebu Provincial Hospital alas 4:00 sa hapon alang sa unang tambal human maigo sa ilok. Human sa medical assessment, gi-refer siya sa usa ka ospital sa Cebu City alang sa dugang tambal ug posible nga operasyon. Sa pagkakaron, stable na ang iyang kondisyon ug padayon nga ginabantayan sa mga doktor.
Nahuman ang operasyon human gisunog sa suspetsado ang balay diin siya nagtago tungod sa iyang pagdumili sa pagsurender. Nakontrol sa kapulisan ang sitwasyon nga walay dugang casualty.
Si PCOL Abubakar Udang Mangelen Jr. midayeg sa kaisog sa pulis ug misaad sa bug-os nga suporta sa iyang pag-ayo. Matud pa niya, ang sakripisyo ni Villaraiza nagpakita sa tinuod nga serbisyo ug dedikasyon sa kapulisan.
Gipasiugda sa Cebu Police Provincial Office nga padayon silang magbantay sa kalinaw ug kahapsay sa komunidad ug motubag dayon sa bisan unsang hulga sa seguridad sa publiko.
Source: CPPO
I via Renante Socia Lada