Gikumpirmar sa Police Regional Office 8 (PRO-8) nga ang duha ka tawo nga kaniadto gitaho nga nawala sa Mayorga, Leyte, mao ra ang duha ka lawas nga nakit-an sa Silago, Southern Leyte.
Nasiguro kini human mahuman ang forensic ug medico-legal examination nga gihimo sa Regional Forensic Unit 8 (RFU-8).
Mipadayag ang PRO-8 sa ilang lawom nga pahasubo sa mga pamilya sa mga biktima. Gisiguro usab sa kapulisan nga ilang ipadayon ang imbestigasyon aron manubag ang mga responsable sa krimen.
Sumala sa PRO-8, padayon ang ilang pagpalig-on sa imbestigasyon pinaagi sa pagkolekta og mga ebidensya, pagpangayo og testimonya sa mga saksi, pagsubay sa tanang posibleng motibo ug koordinasyon sa ubang law enforcement units aron dali nga mailhan ug madakpan ang mga suspek.
Naghangyo usab ang PRO-8 sa publiko nga likayan ang pagpakaylap og wala mapamatud-ang impormasyon nga mahimong makababag sa imbestigasyon. Giawhag usab ang bisan kinsa nga adunay kasayuran bahin sa maong kaso nga motaho dayon sa labing duol nga estasyon sa pulis o pinaagi sa opisyal nga komunikasyon sa Philippine National Police.
I via Renante Socia Lada