Mitahan sa kapolisan ang usa ka lalaki nga nagpaila nga sakop sa media human adunay Warrant of Arrest tungod sa kaso nga cyberlibel ilawom sa Cybercrime Prevention Act of 2012 (RA 10175).
Ang giila nga suspek mao si Noljer Culita Durias, 33 anyos, taga Catmon, Cebu. Siya kanhi nanarbaho sa usa ka FM station sa Dumaguete City ug Ormoc City, ug karon aktibo sa usa ka online FM radio station nga nakabase sa Cebu.
Si Durias boluntaryong mitahan sa mga sakop sa City Intelligence Unit (CIU) sa Cebu City Police Office niadtong Martes, Septyembre 23, sa hapon. Ang pagpaubos nahitabo sa Cebu City Hall of Justice sa Quimonda Building, North Reclamation Area, Mabolo.
Base sa rekord, ang warrant batok kaniya giisyu ni Hon. Judge Ma. Josefa Pinza Ramos sa Regional Trial Court, Branch 90 sa Danao City, niadtong Septyembre 10, 2025. Gitugotan kini og pyansa nga ₱48,000 alang sa iyang temporaryong kagawasan.
Karon, padayon ang proseso sa kaso samtang si Durias nakapahimulos sa katungod sa pyansa samtang nagpaabot sa dugang nga legal nga mga lakang batok kaniya.
I via Renante Socia Lada