Gilusad sa Site Task Group (STG) Central Visayas ang ilang misyon alang sa ika-48 nga ASEAN Summit 2026 pinaagi sa usa ka Send-Off Ceremony nga gipahigayon sa Mactan Shrine niadtong Mayo 2.
Ang maong kalihokan gipangunahan ni Lapu-Lapu City Mayor Ma. Cynthia “Cindi” King Chan ug sa Chief sa Philippine National Police nga si PGEN Jose Melencio C. Nartatez Jr. Gipakita usab dinhi ang daghang tropa ug modernong kagamitan sa seguridad, nga nagpasabot nga andam na ang Pilipinas sa pag-host sa maong internasyonal nga tigum.
Dako usab ang papel sa Sub-Site Task Group (SSTG) Lapu-Lapu City nga maoy nagdumala sa lokal nga aspeto sa seguridad. Sila ang nagbantay sa mga hotel nga kapuy-an sa mga delegado, mga venue sa summit, ug mga dalan nga agianan sa mga bisita. Apil usab sa ilang responsibilidad ang pagpanalipod sa mga turista ug pagsiguro nga andam ang tanang emergency response kung adunay dili kalit nga panghitabo.
Nagtinabangay ang STG Central Visayas ug SSTG Lapu-Lapu aron masiguro nga kompleto ug hapsay ang seguridad sa tibuok siyudad. Sumala sa mga opisyal, ang ilang koordinasyon naghatag og kasiguruhan nga matag detalye sa seguridad natutukan pag-ayo.
Gibase kini sa “whole-of-government approach” diin nagkahiusa ang nagkalain-laing ahensya sa gobyerno ug lokal nga pamunuan aron mapanalipdan ang tanang delegado ug bisita sa tibuok panahon sa summit.
Matud pa ni Police Colonel Agosto P. Daskeo, City Director sa Lapu-Lapu City Police Office ug lider sa SSTG, andam ang ilang pwersa sa pagseguro nga malinawon ug luwas ang matag kalsada ug lugar alang sa tanang bisita, lokal man o langyaw.
Ang maong lakang kabahin sa kampanya sa gobyerno nga “Bagong PNP para sa Bagong Pilipinas,” nga nagtinguha sa paspas, matinud-anon, ug mabatyagan nga serbisyo sa katawhan.
Source: LCPO
I via Renante Socia Lada