Nikutlo og duha ka mga kinabuhi ug niangol og tulo ka mga tawo ang disgrasya sa pag ayo usa ka Christmas tree entry sa Lingganay Festival sa Brgy. Poblacion, alas 5:30 sa hapon, Lunes, Enero 6.
Ang mga namatay giila nga sila si Kagawad Elnie Endencio sa Brgy. Arebasore ug si Jonel Tenebroso, 31-anyos, operator sa lift truck ug residente sa Brgy. Mayapose. Ang mga naangol mao sila si Jay-ar Norbe, 33-anyos, kagawad; Realyn Billares, 19-anyos, SK Chairwoman sa Brgy. Banban; ug Kimjun Padasay, 30-anyos, Barangay Secretary sa Arebasore.
Matod sa inisyal nga imbestigasyon, ang mga biktima naggamit og man lift truck aron tangtangon ang mga Christmas lights sa Christmas tree. Apan, ang boom sa truck naigo sa livewire, hinungdan nga nakuryente ang mga biktima.
Ang maong Christmas tree usa ka entry sa Christmas Tree Making Contest, nga kabahin sa Lingganay Festival, usa ka sikat nga selebrasyon sa Mabinay. Ang mga biktima nag-andam na unta sa pagbalik sa Christmas tree ngadto sa Arebasore dihang nahitabo ang aksidente.
Gideklarar nga dead-on-arrival sa Mabinay Medicare Hospital ang duha ka biktima, samtang ang tulo ka naangol anaa na sa stable nga kahimtang, sumala ni Dr. Ernest T. Uy. (Renante Socia Lada)