Usa ka habal-habal driver ang gidal-a sa presinto human ireklamo sa usa ka 16-anyos nga estudyante nga gipasanginlan niya og dili angay nga pagbuhat samtang nagpasakay sa Barangay Pit-os, Cebu City, niadtong niaging adlaw.
Ang suspetsado nailhan nga si Joel Nuñez Limotan, 30, residente sa Sitio Burgos, Pit-os. Sumala sa reklamo, samtang nagpadulong sila sa balay sa biktima, giingong gihikap-hikap sa drayber ang paa sa estudyante nga alias “Shennah.” Tungod niini, nagdali ang biktima sa pagpahibawo sa iyang inahan mahitungod sa nahitabo.
Sa pagkakita sa inahan, didto dayon sa dapit diin nagtapok ang uban pang mga habal-habal driver gipangayo ang hustisya sa iyang anak. Ang inahan mismo ang mipatuman og citizen’s arrest ug dayong gidala si Limotan sa Talamban Police Station aron maatubang sa hustisya.
Kasong Acts of Lasciviousness ang giandam karon batok sa suspetsado samtang nagpadayon ang imbestigasyon sa kapulisan. Gibalhog kini karon sa prisohan samtang nagpaabot sa pormal nga pagpasaka sa kaso.
Nagpahinumdum ang kapulisan sa publiko nga importante ang dayong pagsumbong sa mga insidente sama niini aron mapanalipdan ang mga kabatan-onan ug malikayan ang sama nga krimen sa komunidad.
I via Renante Socia Lada