Lig-on nga gipatuman sa Cebu City Police Office (CCPO) ubos sa pagpanguna ni PCOL Enrico Evangelista Figueroa, Acting City Director, ang Oplan Bulabog ug Oplan Bakal-Sita niadtong Septembre 15, 2025. Tumong niini mao ang pagpugong sa krimen ug pagsiguro sa kahapsay sa siyudad, ilabina sa payday diin daghan ang mogawas aron maglingaw-lingaw.
Sa operasyon, ₱59,092 nga kantidad sa gituohang shabu ang nasakmit gikan sa unom ka suspek. Gipasanginlan sila ilawom sa RA 9165 o Comprehensive Dangerous Drugs Act of 2002. Upat usab ka tawo ang nadakpan tungod sa iligal nga pagpanag-iya og armas nga supak sa RA 10591.
Girescue usab ang 40 ka menor de edad nga nasakpan nga nakalapas sa curfew samtang nagpahigayon og inspeksyon sa 192 ka establisemento. Dugang pa, 26 ka citation tickets ang gi-issue alang sa kalapasan sama sa pagpanigarilyo ug pag-ihi sa pampublikong lugar.
Si PBGEN Redrico A. Maranan, Regional Director sa PRO-7, mipasabot nga ang lig-on ug makita nga presensya sa kapulisan maoy dakong hinungdan aron malikayan ang krimen.
Dugang pa niya, ang pakigtambayayong sa komunidad ug partner agencies mao gyud ang yawe aron mapadayon ang luwas ug malinawon nga mga komunidad sa Cebu City.
Kini nga operasyon usa ka timaan sa pagsugod sa Crime Prevention Week ug nagpakita sa padayon nga paningkamot sa CCPO nga maprotektahan ang katawhan batok sa drogas, armas, ug uban pang krimen.
Source: CCPO
I via Renante Socia Lada