Usa ka 25-anyos nga lalaki ang namatay samtang duha ka Korean national ang naangol human magdasmag ang gimaniho nga motorsiklo ug taxi sa daplin sa FF Cruz Avenue ug CD Seno Street, Tipolo, alas-2:30 sa kadlawon, Lunes, Septembre 22, 2025.
Ang biktima giila nga si Ronnie Cueva Amadeo, taga-Bantigue, Bantayan Island. Ang taxi gimaneho ni Pedro Maderal Macas Jr., 47 anyos, taga-Mabolo, Cebu City. Sakay sa taxi ang mga Korean national nga sila si Jamin Byun, 50, ug Jinsil Kim, 45, nga kasamtangang nagpuyo sa usa ka hotel sa Mabolo.
Matod sa inisyal nga imbestigasyon, gikan sa CD Seno Street padulong Ouano Avenue si Amadeo, samtang gikan sa FF Cruz Avenue paingon Cebu City ang taxi. Tungod sa ka kusog sa dagan sa motorsiklo, wala na kakontrolar ang biktima ug nabangga diretso sa taxi. Nalagpot si Amadeo ug nakaangkon og grabeng kadaot sa lawas.
Dalidali siyang gidala sa hospital apan gideklarar nga dead on arrival. Samtang ang duha ka Korean nga pasahero sa taxi nakabaton og bun-og ug samad, apan wala ra ma grabe.
Padayon pa ang imbestigasyon sa kapulisan kalabot sa maong insidente nga nikutlo og kinabuhi.
Source: MCPO
I via Renante Socia Lada