Nagpahinumdom ang Police Regional Office 7 (PRO7) sa publiko nga magpabiling mabinantayon aron malikayan ang pagpangawat ug mapanalipdan ang ilang mga kabtangan.
Sumala sa PRO7, importante nga kanunay i-lock ang mga pultahan ug bintana sa balay bisan mubo lang ang paggawas. Gidasig usab ang publiko nga dili ibilin sa makita nga lugar ang kuwarta, alahas, cellphone, ug uban pang mahalon nga mga butang.
Gipahinumdoman usab ang mga lumulupyo nga i-report dayon sa kapulisan ang bisan unsang kadudahang tawo o kalihokan sa ilang komunidad aron malikayan ang krimen.
Tambag usab sa PRO7 nga likayan ang paglakaw nga mag-inusara, ilabina sa ngitngit ug mingaw nga mga lugar sa gabii. Mas maayo kon adunay kauban aron mas luwas.
Gidasig usab ang publiko nga dili mogamit og cellphone samtang naglakaw sa pampublikong lugar aron magpabiling alerto sa palibot ug malikayan ang mga kawatan.
Dugang pa, girekomendar sa PRO7 ang pagbutang og suga sa gawas sa balay, CCTV kung mahimo, ug ang pagtinabangay sa mga silingan aron mapalig-on ang seguridad sa komunidad.
Sa panahon sa emerhensiya, gitambagan ang publiko nga motawag dayon sa 911 aron makadawat og tabang gikan sa mga awtoridad. Ang PRO7 nag-awhag sa tanan nga mag-amping kanunay ug magtinabangay aron mapadayon ang kalinaw ug kaluwasan sa komunidad.
I via Renante Socia Lada