Nakasakmit ang mga otoridad og mga gamit sa iligal nga paghimo og pusil human kini boluntaryong gisurender sa mga pulis sa Sitio Lantawan, Barangay Cahumayan, Danao City, karong Oktubre 5, 2025.
Alas 3:30 sa hapon, samtang nagpadayon ang mga personahe sa 1st Provincial Mobile Force Company (PMFC) sa ilang operasyon ubos sa Oplan Katok, usa ka residente sa lugar ang misurender sa mga gamit nga gigamit sa iligal nga paghimo og armas.
Lakip sa mga gisurender mao ang pito ka buok nga steel piles (round ug flat), usa ka lower receiver sa caliber .45 pistol, usa ka AR15 handle, usa ka drill chuck, usa ka bench grinder, ug usa ka bench motor. Ang tanan nga kagamitan karon anaa na sa kustodiya sa 1st PMFC, Cebu Police Provincial Office (CPPO) para sa hustong pagproseso.
Kini nga kalamboan gisundan sa pagkasikop sa duha ka tawo niadtong Oktubre 2, 2025, nga nalbigitsa iligal nga paghimo og pusil sa maong dakbayan. Matod sa mga otoridad, resulta kini sa mas hugot nga presensya sa kapulisan ug aktibong kooperasyon sa komunidad.
Gidayeg ni PBGen Redrico A. Maranan, Regional Director sa Police Regional Office 7, ang maong pagsurender ug nanawagan sa uban nga mohunong na sa iligal nga kalihokan.
Padayon ang PRO7 sa pakigtambayayong sa lokal nga mga panggamhanan aron mapugngan ang pagkatag sa iligal nga armas ug pagbungkag sa mga iligal nga gunmaking operations sa tibuok Central Visayas.
Source: PRO7- PIO
I via Renante Socia Lada