Nasunog pasado alas 8:00 kagabii Oktobre 5, 2025, ang generator room sa munisipyo sa Medellin, nga nahimutang tapad mismo sa municipal building. Nakaalarma kini sa mga residente nga duol sa maong lugar.
Sumala sa usa ka netizen nga si Roland Lim Go, kalit lang nga adunay nadungog nga kusog nga pagbuto gikan sa dapit sa generator room, ug pagkahuman niini, misunod dayon ang kalayo. Paspas nga mikaylap ang sunog tungod sa presensya sa gasolina ug kuryente sa maong pasilidad.
Dali miresponde ang Bureau of Fire Protection (BFP)–Medellin uban sa mga sakop sa Municipal Disaster Risk Reduction and Management Office (MDRRMO). Human sa pipila ka minutos nga pagpaningkamot, napalong ra usab ang kalayo ug wala nay mikaylap pa ngadto sa main building.
Gipasabot sa lokal nga kagamhanan sa Medellin nga ang generator room ra gayud ang nadamay, ug walay tawo nga nasamdan sa maong insidente. Gitun-an karon sa mga awtoridad ang hinungdan sa sunog aron masiguro nga dili na kini mausab.
Nagpasalamat ang LGU Medellin sa paspas nga aksyon sa mga bombero ug tanang nitabang sa pagpakunhod sa kalayo. Gipahimangnoan usab ang publiko nga magmatngon sa paggamit sa kuryente ug mga gamit nga dali masunog, labi na karon nga init ug uga ang panahon.
I via Renante Socia Lada