Opisyal nang giablihan kagahapon Hulyo 8 ang tulo ka adlaw nga Youth Forum on Heritage 2026 sa Cebu City Museum. Gitambongan kini sa mga batan-ong lider gikan sa nagkalain-laing barangay sa Cebu City aron makat-on unsaon pagpanalipod sa kultura ug kabilin sa siyudad.
Ang maong forum gipasiugdahan sa Cebu City Government pinaagi sa Cultural and Historical Affairs Office uban sa ilang mga kauban nga organisasyon. Tumong niini nga dasigon ang kabatan-onan nga mahimong aktibong kabahin sa pag-atiman sa mga kultural nga kabilin ug pagpalambo sa turismo.
Sa iyang mensahe, si Mayor Nestor Archival mipasiugda nga importante ang pagpreserbar sa kasaysayan ug kultura sa Cebu City. Matud pa niya, kinahanglan nga mahibal-an ug ampingan ang kagahapon aron mas lig-on ang kaugmaon, ug nagsaad ang lokal nga panggamhanan nga mopadayon sa pagsuporta sa mga programa alang sa kultura.
Sulod sa tulo ka adlaw, moapil ang mga partisipante sa mga workshop, cultural mapping, paghimo og mga proyekto alang sa pagpanalipod sa kabilin, ug paghimo og digital content aron mapasiugda ang heritage tourism sa Cebu City.
Pinaagi niini, gilauman nga mas daghang batan-ong Sugboanon ang mahimong kabahin sa pagpreserbar sa kultura alang sa umaabot nga mga henerasyon.
I via Renante Socia Lada