Gipahibalo ni Dumanjug Mayor Gungun Gica ang pagpatuman sa mas hugot nga mga lagda aron mapalig-on ang kaluwasan ug disiplina sa mga estudyante sa lungsod.
Sugod Hunyo 24, 2026, adunay mga guwardiya nga magbantay sa tanang ganghaan sa eskwelahan ug ang tanang mosulod mahimong inspeksyonon subay sa mga polisiya sa eskwelahan ug balaod. Gidili usab ang pagdala og armas, hait nga mga butang, eksplosibo ug uban pang delikadong kagamitan sulod sa campus.
Gipahibalo usab sa mayor nga sugod karon, dili na tugotan ang mga estudyante sa pagdala og cellphone sa eskwelahan. Karong semanaha, ang mga makumpiskar nga cellphone ibalik human sa klase, apan sugod sunod Lunes, huptan na kini sumala sa mga lagda sa eskwelahan.
Hugot usab nga ipatuman ang curfew sa mga menor de edad. Ang mga estudyante sa Grade 10 paubos kinahanglan naa na sa ilang panimalay alas-8 sa gabii, samtang ang tanang ubos sa 18 anyos kinahanglan mosunod sa alas-10 sa gabii nga curfew.
Dugang pa, gidili ang pagpanigarilyo ug pag-inom og makahubog nga ilimnon sa mga 21 anyos paubos, lakip na ang pagpalit o pagpabaligya kanila og sigarilyo ug alkohol.
Nanawagan si Mayor Gica sa kooperasyon sa mga ginikanan, estudyante ug tibuok komunidad aron mapreserbar ang kalinaw, disiplina ug kaluwasan sa mga kabatan-onan sa Dumanjug.
I via Renante Socia Lada