Segon sa Cebu City PIO nga nimando ni Mayor Raymond Alvin Garcia karong adlawa, Oktubre 31, 2024, ngadto kang Cebu City Police Office Director Antoñietto Cañete nga bantayan sa kapulisan ang pagpanguha og mga buwak, kandila, ug bombilya sulod sa mga sam-ang dinhi sa dakbayan sa Sugbo.
Kini human nga may nipadagat sa maong reklamo nga mga managkutay sa menteryo sa Carreta ngadto sa mayor atol sa iyang subling pagbisita mga dagkong sam-ang sa Carreta, Calamba, ug Poblacion Pardo, kaganihang buntag, u ka adlaw sa dili pa ang kasaulogan sa Adlaw sa mga Santos sa Nobiyembre 1 ug sa Adlaw sa mga Kalag karong Sabado, Nobiyembre 2.
“Mangawat kuno og mga buwak, kandila, nga ilang ibutang. Mawa ra kuno dayon. Usa na sa atong gitan-aw sad ang atong mga buwak, kandila nga i-offer bitaw…. Usahay naay suga ilang ipamutang nya mawala lang sila’g kadyot, unya mawa pud ilang gipamutang,” sulti ni Mayor Garcia.
Sa iyang bahin, niingon si Col. Cañete nga iyaha dayong gimandoan ang iyang mga sakop, ilabina ang mga intelligence personnel, sa pag-atiman sa gisangon sa mayor, kay may gipakatap man nga mga pulis sa kada sam-ang sa dakbayan.
Gawas sa mga pulis, aduna say naka-duty nga mga sakop sa Bureau of Fire Protection, Philippine Red Cross, ug mga force multipliers sama sa mga tanod ug mga volunteers sa mga sam-ang 24 oras kada adlaw.
Ingon ni Col. Cañete, dili nila hatagan og higayon ang mga badlongon sa katilingban nga mopahimulos sa kahigayonan tungod kay dili lang ang mga sam-ang maong ilang gibantayan lakip na sab ang mga dagkong establisamento nga naa dinhi sa dakbayan. (Renante Socia Lada)
(Source: Cebu City PIO)