Gihatag ni Cebu City Mayor Nestor Archival ang pinakabag-ong kahimtang sa mga programa ug proyekto sa dakbayan atol sa iyang press briefing kagahapon Hulyo 27.
Matod niya, nagpadayon ang suporta sa nasyonal nga gobyerno pinaagi sa mga pondo alang sa imprastraktura, produksyon sa pagkaon, pagpangandam sa kalamidad, ug pagpalig-on sa kalinaw ug kahapsay. Naglaum usab siya nga mapadayon ang dagkong proyekto sa Department of Transportation aron makatabang sa pagsulbad sa problema sa trapiko sa Cebu City.
Nagpadayon usab ang koordinasyon sa Cebu City, Department of Transportation, ug Regional Development Council alang sa implementasyon sa Cebu Bus Rapid Transit (CBRT). Sumala sa mayor, usa sa mga hagit mao ang pag-angkon sa road right of way sa pipila ka lugar, apan nagtinabangay ang siyudad ug ang nasyonal nga gobyerno aron masulbad kini. Samtang, nangandam usab ang siyudad sa paglunsad sa online nga serbisyo ug digital payment system aron mas sayon ug paspas ang pagkuha sa mga serbisyo sa City Hall.
Giawhag usab ni Mayor Archival ang mga kwalipikadong magtutudlo sa pampublikong eskwelahan nga mo-aplay sa scholarship program alang sa master’s ug doctorate degree. Sa peace and order, iyang gipasiugda nga kinahanglan mapanalipdan ang kaluwasan sa publiko samtang gitahod gihapon ang katungod sa malinawon nga pagprotesta subay sa balaod. Nagpadayon usab ang imbestigasyon sa city-owned green bus aron matino ang tanang responsable sa nahitabong insidente.
Mahitungod sa solid waste management, adunay miting sa Hulyo 31 uban sa Department of Public Services, mga kontratista, drayber, ug uban pang sektor aron mapalambo ang sistema sa pagkolekta sa basura. Giawhag usab sa mayor ang mga residente nga motabang pinaagi sa hustong paglabay sa basura ug pag-atiman sa kalikupan, tungod kay ang kalimpyo sa siyudad responsibilidad sa gobyerno ug sa katawhan.
Padayon usab ang suporta sa siyudad sa kampanya batok sa ilegal nga drogas ug gihisgutan ang posibilidad sa mas hugot nga drug testing alang sa mga public utility driver subay sa balaod. Gipadayon usab ang pag-validate sa mga benepisyaryo sa ayuda alang sa mga drayber sa pampublikong transportasyon ug ang pagmonitor sa posibleng kaso sa African Swine Fever (ASF).
Sa pagtapos, gisiguro ni Mayor Archival nga magpadayon ang pagpalambo sa serbisyo publiko pinaagi sa lig-on nga koordinasyon sa mga ahensya sa gobyerno, digitalisasyon, ug mas epektibong mga programa alang sa mga Sugboanon.
I via Renante Socia Lada