Gidayeg ni Cebu Governor Pamela S. Baricuatro ang mga prayoridad nga gipasiugda ni Presidente Ferdinand “Bongbong” Marcos Jr. atol sa iyang ikalimang State of the Nation Address (SONA). Matud niya, ang kadaghanan sa mga programa nga gihisgutan nahiuyon sa mga panginahanglan ug prayoridad sa Probinsya sa Sugbo.
Usa sa iyang gisuportahan mao ang pagpalig-on sa disaster response, ilabina human sa mga kalamidad nga nasinati sa Sugbo. Gidayeg usab niya ang paghatag og dakong pagtagad sa food security, agrikultura, ug mga lakang aron maminusan ang gasto sa mga pamilya sama sa tax exemptions ug pagtangtang sa system loss charges sa bayranan sa kuryente.
Giingon usab ni Baricuatro nga nalipay siya sa plano sa pagpalapad sa mga programa sa panglawas, lakip ang Universal Healthcare, Yakap Program, dugang nga benepisyo sa PhilHealth, ug rehabilitasyon alang sa mga nanginahanglan. Gisuportahan usab niya ang paghatag og dugang nga oportunidad sa medical scholarships, nga susama sa scholarship program sa Probinsya sa Sugbo kauban ang Cebu Normal University.
Sa katapusan, gipasiugda ni Governor Baricuatro nga andam ang Probinsya sa Sugbo nga magpadayon sa pakigtambayayong sa nasudnong gobyerno aron mapalambo ang mga programa ug serbisyo alang sa mga Sugboanon, samtang ipadayon usab ang mga lokal nga prayoridad ug kalamboan sa probinsya.
I via Renante Socia Lada