Cebu City – Gituki sa tigom sa membro sa Committee on Transportation and transport providers ang posibilidad nga katugtan ang maximum ngadto sa lima ka mga pasahero nga mag standing sakay sa modern public utility jeep (MPUJ), sa intra-city routes sa dakbayan sa Mandaue atol sa peak hours.
Kini ug ubang pang mga issues ang gituki atol sa tigom, Hulyo 6, 2022, nga nagtinguhang maka tubag sa overloading sa MPUVs u gang kakuwangan sa MPUVs nga magbyahean sa rota sa syudad.
Gi-angkon sa ubang mga transport providers nga dunay kakuwangan sa MPUJ units nga nagbyahe sa intra-city routes, hinungdan nga ang uban mopasakay ug mas daghan nga mga pasahero,labi na sa peak hours.
Apan, giklaro hinoon sa transport groups nga ang standing sa mga pasahero wala mabutang sa ilang guidelines ug gipahinumduman ang mga drivers kalabot niini.
“Amo na sila’ng ingnan nga pasabta ang pasahero total atoang biyahe taas pa man ta’g oras, ayaw ninyo isugal inyong lisensiya kay inyo nang kalautan, wala gyud ni nag-allow og pabarog,” pasabot ni Board of Director Michael Rodriguez sa United Drivers and Operators Transport Cooperative (UDUTCO).
Gumikan kay dili igo ang mga units nga nag byahe sa maong mga rota, ilang gihangyo ang committee nga katugtan sila nga maka pasakay ug pipila ka mga standing nga pasahero.
“Kung unsay gidesign ana nga MPUJ mao ra pod nay iallow sa barog dili pod sobra na kaayo kay overloading naman na kaayo unya ingun ana nga paagi matabangan nato magamay-gamay ang pasahero nga maglinya, magpaabot makasakay,” mensahi ni Loreto Herez Jr. sa Mandaue Transport Cooperative.
Case-to-case basis
Gipahibaw ni Committee on Transportation Chairman Councilor Jimmy Lumapas nga sigon sa Land Transportation Franchising and Regulatory Board Central Visayas (LTFRB-7), mahimong matugtan ngadto sa lima ka mga pasahero ang magbarug ; apan giklaro sa konsehal nga kinahanglang dunay resolution gikan sa city council nga magtugot niini.
Matod ni Lumapas nga ilang obserbahan ug mangayo una silag opinion gikan sa riding public sa dili pa sila mo draf ug resolution.
“Kami pa ang mohimo. Ato sa ning i-observe,” nagkanayon si Lumapas.
Samtang si Victor Cosep, LTFRB-7 planning officer, mipa hinumdum sa transport providers pag operate 24/7.
Sa iyang bahin, si Edwin Jumao-as, exexecutive director sa Traffic Enforcement Agency of Mandaue (TEAM),mi warning nga ilang i-apprehend ang overloading MPUJs, pero case-to-case basis.
“Buot pasabot, og ma duha, okay. Pero if grabe gyud, overloading na na,” paklaro ni Jumao-as.
Ang multa sa overloading sa Dakbayan sa Mandaue mokantidad ug P1,000.
Si Krizzy Hyll Retuya, chief of staff ni Lumapas, nagkanayon nga duha sa upat ka mga transport providers nga mitambong sa meeting, misaad pag comply sa required nga gidaghanon sa mga units matag rota nga 15 kabook. (Jhon Tadlip)
(News & photo courtesy of Committee on Transportation and Transport Providers-Mandaue City)