Usa ka mananagat ang nakit-an nang patay human kini nalumos sa kadagatan nga sakop sa Purok 2, Barangay Catarman sa lungsod sa Dauis, Bohol sa hapon sa Miyerkules, Mayo 14, 2025.
Ang biktima giila nga si Melchor Amatiad Aranton, 52 anyos, lumolupyo sa nasangpit nga lungsod. Base sa imbestigasyon nga gihimo sa Dauis PNP ilawom ni PSMS Wenifredo Limocon, namukot ang biktima sa kadagatan sa maong adlaw bisan pa sa pag-uwan ug pagkusog sa hangin.
Gituohang tungod sa kalit nga pagdaot sa panahon ug dagkong balod, nawad-an og balanse ang gisakyan ni Aranton ug nalumos.
Niana usab ang pipila ka residente nga posibleng naigo sa kilat ang biktima samtang nanagat, apan kini gisusi pa sa kapulisan aron masuta ang tinuod nga hinungdan sa iyang kamatayon.
Nakit-an ang patay’ng lawas ni Aranton sa baybayon alas 4:15 sa hapon, sulod sa nasudnong teritoryo sa Barangay Catarman.
I via Renante Socia Lada