Usa ka mag-uuma nga nailhan sa komunidad isip tomboy ang napalgan nga patay sa tunga-tunga sa basakan sa Purok 3, Barangay Omjon, lungsod sa Valencia, Bohol sa hapon sa Biyernes, Enero 30, 2026.
Sumala sa inisyal nga report, ang biktima nakaplagan nga adunay grabeng samad sa liog ug mga kadaot sa lawas, nga nagpakita nga dunay nahitabong bayolenteng krimen. Wala pa ipagawas sa kapulisan ang dugang detalye samtang nagpadayon ang hustong imbestigasyon.
Matud sa mga silingan, nakita pa ang biktima nga nag-ani og humay sa tibuok adlaw sa Huwebes. Sa ulahi nga bahin sa adlaw, giingong nakig-inom kini sa tulo ka lalaki sa usa ka abandonadong balay duol sa lugar.
Sa tulo ka lalaki, usa ang misibat na, samtang ang duha ka nahibilin mihimakak sa ilang kalambigitan sa krimen. Matud nila, sayu silang namauli ug gibiyaan ang biktima kauban sa lalaki nga karon giingong gitutukan sa imbestigasyon.
Ang Valencia PNP nagpadayon sa pagsusi aron matino ang tinuod nga nahitabo, lakip na kung adunay laing krimen nga nahitabo sa wala pa mapatay ang biktima. Gihangyo sa kapulisan ang publiko nga motabang pinaagi sa paghatag og kasayuran nga makatabang sa pagdala sa hustisya sa biktima.
📸 CTTO
I via Renante Socia Lada