Nasikop ang duha ka mananagat human nasakpan sa ilegal nga pagpanagat sa kadagatan sa Barangay Himensulan, San Francisco, Cebu.
Sumala sa San Francisco Municipal Police Station, uban sa Department of Agriculture (DA), nasakpan ang duha atol sa sea-borne patrol tungod sa paglapas sa Municipal Ordinance No. 2006-041 batok ilegal nga pagpanagat.
Ang mga suspek, nga nailhan lamang sa mga alyas nga “Alias Nonie” ug “Alias Rodzkie,” gikatahong naggamit og oxygen compressor nga lokal nga gitawag og “boso,” nga bawal gamiton sa pagpangisda. Gipahibalo sila sa ilang katungod ug sa kasong ilang nalapas.
Nakumpiskar sa operasyon ang motorized banca, improvised oxygen tank, plastic hose, mga pana sa pangisda, gasolina, ug nagkalain-laing isda. Gidala ang mga suspek sa San Francisco MPS, samtang ang mga narekober nga butang giturn-over sa DA alang sa hustong pagdumala.
Miingon si PCOL Abubakar Udang Mangelen Jr., Provincial Director sa CPPO, nga padayon silang magbantay ug magpatuman sa balaod aron mapanalipdan ang atong kinaiyahan sa dagatan ug masiguro ang panginabuhian sa matinud-anong pagpanagat.
Source: CPPO
I via Renante Socia Lada