Patay diha-diha dayon ang usa ka mag-uuma human kini gipusil sa wala pa mailhing mamumuno samtang paingon sa iyang uma sa Sitio Danawan, Barangay Biga, Toledo City, ning buntag, Enero 15, 2025.
Ang biktima nailhan nga si Lorenzo Bacalso Dacuma, 51-anyos, nga nagpuyo sa Sitio Cumba, sa mao gihapong barangay, kauban sa iyang live-in partner nga si Lea Kalag.
Base sa imbestigasyon sa Toledo City Police, alas 5 sa buntag, paingon si Dacuma sa iyang uma aron mag ani og kamatis. Wala pa siya makaabot, nadunggan sa iyang stepson nga si Lenmar Manolong, 16-anyos, ang kalit nga mga buto sa armas.
Sa iyang pagsusi, iyang nakit-an ang iyang stepfather nga nagbuy-od ug naligo sa kaugalingong dugo. Sa pagkakaron nagpadayon ang imbestigasyon sa mga otoridad aron matino ang pagkakilanlan sa suspetsado ug ang hinungdan sa krimen.
Panawagan usab sa kapulisan ang kooperasyon sa mga residente nga adunay impormasyon aron masulbad ang kaso ug madakpan ang responsabli niini.
via Renante Socia Lada