Gisuspenso sa Land Transportation Office Region 7 ang lisensya sa usa ka driver ug gi-issuehan og Show Cause Order batok sa tag-iya sa sakyanan human sa usa ka road rage incident niadtong gabii sa Abril 6, 2026, sa Lipata, Tungkil, Minglanilla, Cebu.
Sa viral nga video sa social media, makita ang lalaki nga driver nga naggunit og pusil ug naghulga sa usa ka motorista samtang nag-standby sa daplin sa karsada mga alas 10:20 sa gabii. Sumala sa mga testigo, posible nga hubog ang driver o nagmaneho ubos sa impluwensya sa alkohol.
Tungod niini, gihimo dayon sa LTO 7 ang preventive suspension sa lisensya sa drayber sulod sa 90 ka adlaw, nga epektibo dayon.
Giingon ni Regional Director Atty. Wendel G. Dinglasan nga preventive measure kini ug human sa proseso, posibleng ipatuman ang tinuod nga penalidad lakip ang revocation sa lisensya. Ang driver gimandoan nga isurender ang lisensya sa petsa sa hearing sa Abril 17, 2026.
Gibutang usab sa ALARM status ang sakyanan, nga narehistro sa lain nga ngalan, aron mapugngan ang bisan unsang transaksyon samtang nagpadayon ang imbestigasyon.
Gisugo ang duha ka partido nga magsumiter og verified o sworn explanation alang sa paglapas sa Section 27 sa Republic Act No. 4136 ug sa Republic Act No. 10586.
Source: LTO-7
I via Renante Socia Lada