Usa ka 70 anyos nga German national ang namatay samtang milagro nga naluwas ang usa ka tres anyos nga batang babaye human mahulog ang ilang sakyanan sa gibana-banang 600 ka tiil nga pangpang sa Barangay Jalomaynon, Dalaguete, Cebu niadtong Pebrero 18 sa hapon.
Ang namatay giila nga si Frank Tessow, usa ka pensyonado nga langyaw nga kapin lima na ka tuig nagpuyo sa maong lugar. Ang naluwas nga bata apo sa iyang asawa nga Pilipina.
Sumala sa inisyal nga imbestigasyon, nagmaneho paatras ang lalaki padulong sa main road gikan sa ilang balay sa dihang natipas ang sakyanan sa kilid sa dalan ug kalit nga nahulog sa lawom nga pangpang.
Dali nga mitubag ang mga pulis, bombero, ug rescue team aron sa search and retrieval operation. Narekober nga buhi ang bata nga anaa sa likod nga bahin sa sakyanan ug gidala dayon sa ospital. Karon, anaa na kini sa maayong kahimtang.
Ang German national gideklarar nga dead on the spot tungod sa grabeng kadaot nga iyang naangkon sa impact sa pagkalagpot sa sakyanan. Padayon pa ang imbestigasyon sa kapulisan sa maong insidente.
I via Renante Socia Lada