Usa ka lalaki ang nadakpan sa kapulisan sa Carbon area human masakpan nga nagkupot og ilegal nga armas atol sa pagpatuman sa Oplan Bulabog sa Cebu City Police Office (CCPO). Ang operasyon gihimo ubos sa pagpangulo ni PCOL. George Villarta Ylanan, Officer-in-Charge sa CCPO, isip kabahin sa padayong kampanya batok sa kriminalidad.
Mga alas 10:15 sa gabii niadtong Marso 2, 2026, usa ka concerned citizen ang miduol sa Tracker Team sa Police Station 5 nga gipangulohan ni PCPT Leonyl Iren aron ireport nga adunay armadong personalidad sa Sitio Ermita Proper, Barangay Ermita, Cebu City. Dali nga mitubag ang kapulisan ug mipadulong dayon sa maong lugar.
Mga alas 10:20 sa gabii, malampusong nadakpan ang suspetsado nga nasakpan mismo nga nagkupot og usa ka homemade nga .22 caliber revolver nga walay serial number. Ang maong armas adunay sulod nga duha ka buhing bala.
Gipahibalo dayon ang suspetsado sa iyang kalapasan ug gibasahan sa iyang katungod sumala sa balaod. Sa pagkakaron, anaa siya sa kustodiya sa Police Station 5 samtang gihikay ang pagpasaka sa hustong kaso batok kaniya.
Nagpahinumdom ang CCPO sa publiko nga magpabiling alerto ug makigtambayayong sa kapulisan pinaagi sa pagreport dayon sa bisan unsang kadudahan o kahadlokan aron mapadayon ang kalinaw ug seguridad sa komunidad.
Source: CCPO
I via Renante Socia Lada