Gidakop sa kapulisan ang usa ka 44-anyos nga lalaki human siya napasakaan og kaso sa cyberlibel tungod sa pagpakatap og fake news batok ni Mandaue City Lone District Congresswoman Emmarie “Lolypop” Ouano-Dizon.
Ang suspek giila nga si Redmon Colina, residente sa Barangay Centro, nga konektado sa grupo sa kanhi Mayor Jonas Cortes. Base sa imbestigasyon, si Colina mipakatap ug computer-generated nga quote card nga nagpakita og peke nga pamahayag kuno gikan sa kongresista kalabot sa ₱20 milyon nga Skywalk project sa Barangay Maguikay.
Ang reklamo batok sa suspek gipahamtang pa niadtong Abril sa National Bureau of Investigation (NBI) ilawom sa Cybercrime Prevention Act of 2012 o Republic Act 10175. Gipasabot sa kampo ni Ouano nga wala gayud niya gisulti ang gi-attribute nga pamahayag ug klaro kini nga pagpanglimbong sa publiko.
Gidumala mismo ang pagdakop ni Police Major Philip John Libres, hepe sa MCPO Station 1, uban sa iyang mga sakop, pinasikad sa warrant of arrest nga giisyu ni Judge Allan Francisco Garciano sa Mandaue City Regional Trial Court Branch 83.
Karon, nag-atubang si Colina sa kaso samtang nagpabilin nga gipaandam ang komunidad sa Mandaue batok sa mosunod pang pagpakatap og peke nga impormasyon nga makadaot sa publiko ug sa lokal nga liderato.
Source: MCPO
I via Renante Socia Lada