Usa ka 35-anyos nga walay trabaho nga lalaki ang nadakpan sa kapulisan tungod sa ilegal nga pagpanag-iya og pusil niadtong Pebrero 13, 2026, sa Barangay Canbanua, Argao, Cebu.
Ang suspetsado nga nailhan sa alyas nga si “Eric,” single ug residente sa maong barangay, gisikop tungod sa paglapas sa Republic Act 10591 o Comprehensive Firearms and Ammunition Regulation Act.
Sumala sa report sa kapulisan, mga alas 2:30 sa kadlawon nadawat sa Argao Municipal Police Station ang tawag bahin sa usa ka hubog nga tawo nga nag suroy-suroy sa maong lugar. Miadto dayon ang mga pulis aron susihon ang nahitabo. Sa pag-abot sa lugar, nakita sa mga pulis ang suspetsado nga nagsul-ob og puti nga sweatshirt ug shorts nga floral ang design samtang nagkupot og pusil. Ang pusil nailhan nga usa ka .22 caliber Smith and Wesson Magnum revolver.
Gimanduan dayon sa kapulisan ang suspetsado nga ibutang ang pusil sa yuta, ug nisunod siya. Gipangayo usab sa mga pulis ang mga dokumento sama sa License to Own and Possess Firearm (LTOPF) ug Permit to Carry Firearm Outside Residence (PTCFOR), apan wala siya makapakita og balido nga papeles.
Tungod niini, siya dali nga gidakop ug gipasakaan og kaso nga Illegal Possession of Firearm. Gipahibalo usab siya sa sa iyang sala ug sa iyang katungod isip tawo.
Gidateg ni PCOL Abubakar Udang Mangelen Jr., Provincial Director sa Cebu Police Provincial Office, ang maayong reaksyon sa operating team.
Gihangyo gihapon sa otoridad ang publiko nga i-report dayon ang bisan unsang suspetsadong lihok sa ilang komunidad aron mapugngan ang krimen ug masiguro ang kalinaw ug kahapsay.
Source: CPPO
I via Renante Socia Lada