Naligo sa kaugalingong dugo ang usa ka lalaki nga nalambigit sa pagpamaligya og ginadiling drugas human gipusil sa wala matino na suspetsado.
Nahitabo kini pasado alas 7:00 kagahapon sa buntag, Hunyo 3, 2024, didto sa Purok Paglaum, Barangay Ibabao, lungsod sa Cordova, Sugbo.
Ang biktima giila sa Cordova Police Station nga mao si George Manatad, 4O anyos ang panuigon, residenti sa Lower Sun-ok, sa mao ra nga lungsod.
Sa imbestigasyon sa Cordova Police Station pinanguluhan sa ilang hepe nga si Police Major Joffre Grande, nasayran nga ang biktima bag-ong naabot gikan sa Mindanao.
Nigawas usab sa imbestigasyon nga ang biktima nalambigit kini sa pagpamaligya og ginadiling drugas sa maong lungsod.
Sa pagkakaron padayon ang imbestigasyon sa kapulisan ug tanang anggulo ilang gitan-aw labi na sa kalambigitan niini sa negosya sa ginadiling drugas. (Renante Lada | Ting Joe Pepito)