Usa ka lalaki nga nailhan sa alyas nga “Ating,” 43 anyos, ang nadakpan sa mga sakop sa Inayawan Police Station 7 atol sa usa ka operasyon sa nakalabay na adlaw. Ang suspetsado walay trabaho, single nga adunay live-in partner, ug residente sa Barangay Basak Pardo. Siya gikasuhan sa paglapas sa Republic Act 10591 o ang balaod batok sa ilegal nga pagpanag-iya og armas ug bala, ingon man sa paglapas sa COMELEC gun ban.
Ang operasyon nahitabo pasado alas 10 sa gabii human nakadawat og report ang kapulisan gikan sa usa ka nagpakabanang residente bahin sa usa armadong lalaki nga nagtuyok-tuyok sa ilang lugar. Mihimo dayon og verification operation ang mga sakop sa Station 7, nga misangpot sa dali nga pagkadakop sa suspetsado.
Gikan sa iyang posisyon, narekober sa kapulisan ang usa ka improvised firearm nga gitawag og “pugakhang” ug tulo ka buok buhing bala sa 12-gauge shotgun. Ang suspek kasamtangang anaa sa kustodiya sa Inayawan Police Station 7 ug giandam na ang mga pasangil batok kaniya.
Ang kapulisan mipasalamat sa komunidad sa ilang kooperasyon aron pagpanalipod sa katawhan ug pagsiguro sa kahapsay ug kalinaw. Padayon ang panawagan sa publiko sa pagreport sa bisan unsang kadudahang kalihokan sa ilang palibot.
Source: Inayawan Police Station
I via Renante Socia Lada