Usa ka lalaki nga gibana-banang 40-anyos ang edad ug usa ka street dweller ang nakit-ang patay sa karsada sa AS Fortuna Street, Sta. Cruz, Barangay Guizo, Enero 1, 2025.
Base sa report, nadiskobrehan ang lawas alas 5:45 sa buntag ug gireport kini sa kapulisan alas 7:30 sa buntag. Ang patay’ng lawas girespondehan sa mga sakop sa Police Station 1 (PS1) sa Mandaue City Police Office (MCPO) ug sa City Disaster Risk Reduction and Management Office (CDRRMO) nga gipangulohan ni Melisa Cabilao.
Sa inisyal nga imbestigasyon, ang lawas nakit-an nga naghigda sa daplin sa dalan. Gipamatud-an sa mga personnel nga wala na kini’y vital signs. Human sa mas lawom nga inspeksyon, wala’y nakit-ang samad o senyales sa foul play nga nakaapekto sa kamatayon.
Hangtod karon, wala pa mailhi ang maong biktima ug nagpadayon ang imbestigasyon aron masuta ang hinungdan sa iyang pagkamatay.
Ang mga awtoridad nanawagan sa publiko nga dunay impormasyon kabahin sa biktima o sa maong insidente nga moadto sa PS1 sa MCPO aron makatabang sa imbestigasyon.