Nadakpan sa kapulisan ang usa ka 24-anyos nga lalaki human makuhaan og ilegal nga pusil atol sa operasyon sa Sitio Kapasad, Barangay Dumlog, Toledo City, Cebu, niadtong nakalabay nga mga adlaw.
Sumala sa report, adunay concerned citizen nga nitawag sa kapulisan alas 12:20 sa kadlawon aron ireport ang usa ka hubog nga lalaki nga armado na maoy hinungdan sa kasamok sa maong lugar. Dali nga mitubag ang mga pulis nga nagpatrolya sa duol nga lugar.
Pag-abot sa mga otoridad, nasakpan nila ang suspek nga adunay dala nga pusil nga walay legal nga permit. Dali siyang gidakop mga alas 12:25 sa kadlawon.
Narekober gikan sa suspek ang usa ka kalibre .357 revolver nga walay serial number ug duha ka buhing bala alang niini. Gidala ang suspek ug ang mga ebidensya ngadto sa Toledo City Police Station alang sa hustong dokumentasyon ug pagproseso sa kaso.
Gipa-medical examination usab ang suspek sa Toledo City Hospital ug gikumpirmar sa doktor nga siya angayan nga mapriso samtang naghulat sa pagsang-at sa kaso batok kaniya tungod sa paglapas sa Republic Act No. 10591 o ang Comprehensive Firearms and Ammunition Regulation Act.
Gipasalamatan ni Cebu Police Provincial Office Director, Abubakar Udang Mangelen Jr., ang mga pulis nga dali nga mitubag sa insidente. Matud niya, dako ang papel sa kooperasyon sa komunidad aron mapadayon ang kalinaw ug kahapsay sa mga komunidad ug mapugngan ang kriminalidad.
Nagpadayon usab ang Cebu Police Provincial Office sa kampanya batok sa mga ilegal nga pusil ug mga tawo nga naghulga sa kaluwasan sa publiko.
📸 CPPO
I via Renante Socia Lada