Nadakpan sa mga pulis sa Labangon Police Station 10 ang usa ka 41 anyos nga lalaki tungod sa paglapas sa Republic Act No. 10591 o ang balaod batok sa ilegal nga armas. Ang insidente nahitabo sa Sitio Upper Yati, Barangay Quiot, Cebu City, mga alas 3:10 sa kadlawon niadtong Pebrero 18, 2026.
Ang suspek nadakpan human siya masakpan nga nagkupot og usa ka improvised shotgun nga lokal nga gitawag og “pugakhang,” nga adunay marka nga “RG,” ug tulo ka buok buhing bala.
Sumala sa CCPO, napakyas ang lalaki sa pagpakita og legal nga papeles nga motugot kaniya sa pagpanag-iya ug pagdala sa maong armas ug bala.
Gipahibalo siya sa iyang sala ug sa iyang mga katungod sumala sa balaod. Sa pagkakaron, anaa siya sa kustodiya sa Police Station 10 samtang giandam ang mga dokumento alang sa pagpasaka sa kaso sa korte.
Si PCOL George V. Ylanan, OIC sa Cebu City Police Office, miingon nga magpadayon ang kampanya batok sa ilegal nga armas aron masiguro ang kaluwasan ug kahapsay sa Dakbayan sa Sugbo.
Source: CCPO
I via Renante Socia Lada