Nadakpan sa mga pulis sa Police Station 3 ang usa ka lalaki human mareport nga armado kini sa MJ Cuenco, Barangay Tejero, Cebu City niadtong Mayo 20, 2026 mga alas 8:10 sa gabii.
Giingon sa kapulisan nga daling mitubag ang sakop nga gipangulohan ni PCAPT Michael T. Sevilla human makadawat og reklamo gikan sa mga residente. Sa ilang pag-abot sa lugar ug pag-verify sa report, ilang nadakpan ang suspek nga nagkupot og usa ka caliber .22 Magnum revolver nga adunay usa ka buhing bala sulod sa cylinder niini.
Gipangayoan sa mga pulis ang suspek sa legal nga dokumento alang sa maong pusil apan wala kini makapakita og permit o lisensya. Tungod niini, gidakop siya tungod sa paglapas sa Republic Act No. 10591 o Comprehensive Firearms and Ammunition Regulation Act.
Human sa pagdakop, gidala ang suspek sa Police Station 3 alang sa hustong proseso ug temporaryong gitanggong sa custodial facility samtang giandam ang kaso nga ipasaka batok kaniya sa korte.
Sumala sa Cebu City Police Office ubos sa pagpangulo ni PCOL George V. Ylanan, ang maong operasyon nakatabang sa pagpugong sa posibleng hulga sa kaluwasan sa publiko ug nagpakita sa paspas nga responde sa kapolisan aron mapadayon ang seguridad sa komunidad.
I via Renante Socia Lada