Usa ka 50-anyos nga lalaki ang namatay human kini gitulis ug gipusil sa Barangay Pangdan, dakbayan sa Naga, pasado alas-4 sa kadlawon, Martes, Setyembre 2, 2025.
Giila ang biktima nga si Michael Martos, residente sa maong lugar. Sumala sa kapulisan, giduol kini sa duha ka wala mailhing suspetsado samtang naglakaw pauli ug gipusil human nagdumili sa paghatag sa iyang bag.
Nakuha sa mga suspetsado ang personal nga kabtangan sa biktima sama sa alahas, kwarta, gadgets ug uban pang sulod sa iyang bag. Human sa insidente, dali silang misibat palayo sa lugar.
Dali nga nadala sa ospital si Martos apan gideklarar usab kini nga dead on arrival tungod sa grabeng samad sa lawas nga nadawat sa pagpamusil.
Padayon karon ang imbestigasyon ug hot pursuit operation sa kapulisan aron maila ug madakpan ang mga responsable sa maong krimen, samtang gipanawagan sa mga awtoridad ang kooperasyon sa publiko alang sa hustisya sa biktima.