Nagplano ang Spain-based company nga Acciona nga magtukod og desalination plant sa Mandaue City aron makatabang sa pagsulbad sa problema sa suplay sa tubig sa dakbayan.
Gihisgutan kini atol sa pagbisita sa mga representante sa kompanya sa buhatan ni Mayor Thadeo “Jonkie” Ouano niadtong Mayo 12.
Nangunay sa pagpasabot sa proyekto si Ruben Camba, Managing Director sa Acciona Infrastructure Southeast Asia, kauban si Rina Dakay ug mga opisyal sa MCCI.
Matod ni Camba, tumong sa ilang proyekto nga makatabang sa kagamhanan pinaagi sa dugang solusyon sa kakulang sa tubig sa siyudad. Nangutana usab siya kon adunay nahimong pagtuon kalabot sa posibleng desalination plant sa Mandaue.
Nipasalamat si Mayor Jonkie sa maong proposal ug miingon nga ilang tun-an ug reviewhon kini. Andam usab ang dakbayan nga makigtinabangay kung mapadayon ang proyekto.
Mitambong usab sa maong panagtigom sila Atty. Sally Malig-on Jr., Atty. Riczen Gingoyon, Atty. Erwin Rommel Heyrosa, ug Arc. Marlo Ocleasa.
Source: Mandaue City PIO
I via Renante Socia Lada