Misaka og 24.1% ang pagkunhod sa mga kaso sa krimen sa siyudad sa Cebu gikan Enero hangtod Septyembre ning tuiga, base sa ulahing report sa Cebu City Police Office (CCPO).
Gikan sa 4,843 ka kaso niadtong 2024, mikunhod kini ngadto sa 3,678 ka kaso karong 2025. Usa kini ka positibong timailhan nga nagpakita sa epektibo nga mga pamaagi sa kapulisan aron mapadayon ang kalinaw ug kahapsay sa siyudad.
Sa susamang panahon, mikunhod usab og 52.2% nga pag-ubos ang mga vehicular incidents ug uban pang “quasi-offenses.” Gikan sa 1,009 ka kaso niadtong miaging tuig, mikunhod kini ngadto sa 482 karong tuiga. Kini nagpamatuod nga epektibo ang gipanghimo nga traffic enforcement, checkpoints, ug public awareness campaign sa CCPO.
Sumala ni PCOL. Enrico Evangelista Figueroa, Acting City Director sa CCPO, ang maong resulta bunga sa lig-on nga police visibility, maayong koordinasyon sa barangay, ug padayong suporta sa katawhan. Gipasidungog usab niya ang mga sakop sa kapulisan sa ilang walay hunong nga serbisyo ug dedikasyon alang sa kalinaw ug seguridad sa publiko.
Lakip sa mga hinungdan sa pagkunhod sa krimen mao ang pagpalig-on sa Criminal Investigation and Detection Unit (CIDU) aron paspasan ang pagsulbad sa mga kaso, Oplan Bulabog ug mga night patrols aron mapugngan ang kriminalidad, ug ang Oplan Pakigsandurot, nga nagpalig-on sa relasyon sa kapulisan ug mga residente sa tabang sa Cebu City Government ilawom ni Mayor Nestor Archival.
Dugang pa, gipakusgan usab sa CCPO ang mga checkpoints ug mobile patrols aron mas paspas ang reaksyon sa kapulisan sa tanang barangay. Kini nga mga inisyatiba nakatabang pag-ayo sa pagpugong sa krimen ug sa pagpangandam batok sa mga emerhensiya ug katalagman.
Matod pa ni Col. Figueroa, kini nga kalampusan dili lang sa kapulisan, apan usa kini ka shared victory alang sa tanang Sugbuanong nagtinabangay aron masiguro ang malinawon nga siyudad.
Source: CCPO
I via Renante Socia Lada