Nagmalampuson ang sunod-sunod nga operasyon sa kapulisan sa Cebu City Police Office (CCPO) nga nagresulta sa pagdakop sa 16 ka tawo,12 niini drug suspects, 4 ka armado ug pagluwas sa 618 ka menor de edad atol sa operasyon nga gipahigayon gikan Oktubre 13 hangtod 19, 2025.
Ang operasyon gipangulohan ni PCOL Enrico Evangelista Figueroa, Acting City Director sa CCPO, uban sa koordinasyon sa PBGEN Redrico A. Maranan, Regional Director sa PRO-7. Kini nga mga operasyon ilawom sa Oplan Bulabog ug Oplan Bakal-Sita, nga tuyo aron mapalig-on ang kalinaw ug seguridad sa dakbayan.
Sa operasyon, 12 ka drug suspects ang nadakpan ug nakuhaan og 8.4 gramos nga gituohang shabu nga nagkantidad og ₱57,120. Ang mga nadakpan nag-atubang og kaso ilawom sa Republic Act 9165 o Comprehensive Dangerous Drugs Act of 2002. Samtang upat ka lalaki usab ang nasikop tungod sa iligal nga pagpanag-iya og armas, nga nakalapas sa Republic Act 10591.
Gawas sa pagdakop, 618 ka menor de edad ang naluwas sa operasyon sa kapulisan tungod sa curfew violations. Gipang-turn over sila sa social welfare offices aron matabangan ug malikayan ang ilang pagkabutang sa peligro nga malambigit sa krimen.
Sa padayon nga pagpatuman sa disiplina sa komunidad, ang CCPO nakahimo og 3,326 ka inspection sa mga establisemento, diin 27 ka citation tickets ang gi-isyu batok sa mga nakalapas sa balaod sama sa public smoking ug public urination.
Matod ni PBGEN Maranan, ang kalampusan sa operasyon nagpakita sa kusog nga kooperasyon tali sa kapulisan, lokal nga panggamhanan, ug komunidad.
Si PCOL Figueroa usab mipasalig nga padayon ang ilang operasyon aron maprotektahan ang mga Sugboanon.
Source: CCPO
I via Renante Socia Lada