Naghiusa ang Cebu Provincial Government ug Department of Migrant Workers Region 7 aron mapalig-on ang tabang ug serbisyo alang sa mga Overseas Filipino Workers (OFWs) ug ilang pamilya, ilabi na kadtong naapektuhan sa tensyon sa Middle East.
Tumong sa maong panaghiusa nga mapaspas ang paghatag og tabang sa krisis, mapalambo ang repatriation o pagpauli sa mga OFWs, ug mapadaghan ang oportunidad sa trabaho ug reintegration alang sa mga mobalik nga trabahante.
Niadtong Marso 17, nakigpulong si Gob. Pamela Baricuatro kang DMW-7 Director Jhoaden Lucero sa Cebu Provincial Capitol uban sa ubang opisyal sa probinsya aron hisgutan ang mga lakang alang sa OFWs.
Lakip sa ilang gihisgutan ang mas epektibong crisis response, suporta sa pagpauli sa mga OFWs, ug ang proposed nga “One Window Bayanihan Assistance Program” aron mas sayon ang pag-avail sa serbisyo sa gobyerno.
Gipasiugda usab ang mas lig-on nga koordinasyon tali sa Public Employment Service Office (PESO) ug Cebu People’s Action Center (CPAC) aron matabangan ang mga mobalik nga OFWs sa pagpangita og trabaho ug pagpadayon sa ilang kinabuhi diri sa probinsya.
Source: Cebu Province PIO
I via Renante Socia Lada