Malipayong gipahibalo sa lungsod sa Sergio Osmeña nga magpahigayon kini og upat ka adlaw nga selebrasyon alang sa Women’s Month 2026, nga magpasidungog sa kusog, talento, ug kontribusyon sa kababayen-an sa lungsod.
Ubos sa tema nga “WE for Gender Equality & Inclusive Society,” pagabuhaton ang mga kalihokan gikan Marso 23 hangtod 26, 2026 sa nagkadaiyang lugar sa lungsod.
Sugdan ang selebrasyon sa Marso 23 ug 24 pinaagi sa pickleball tournament nga pagahimuon sa hapon hangtod gabii, samtang ipahigayon usab ang volleyball tournament sa Municipal Gymnasium gikan buntag hangtod hapon, nga magpasiugda sa panaghiusa ug kahimsog sa komunidad.
Sa Marso 25, pagadayonon ang kalihokan pinaagi sa cooking contest nga maghisgot sa lokal nga mga delicacies, nga pagahimuon sa Municipal Hall Grounds sa Poblacion Alto. Samtang sa Marso 26, mosangko ang selebrasyon sa culminating program nga magsugod sa parada gikan sa Municipal Hall padulong sa Public Market ug tapos sa Municipal Gymnasium.
Lakip sa mga highlights ang financial literacy seminar nga maghatag kahibalo sa kababayen-an sa hustong pagdumala sa pinansyal ug panginabuhian. Pagapasidunggan usab ang mga outstanding women sa lungsod ug ang mga mananaog sa volleyball ug cooking competitions.(IKEN B. GULLEM)
Source: Zamboanga del Norte Provincial News Network