Gihatagan og dakong suporta sa Cebu Provincial Government ang 52nd Sinulog sa Carmen pinaagi sa P10.6 milyones nga subsidy. Gipahibaw kini ni Gobernador Gwen Garcia atol sa maong kalihokan niadtong Dominggo, Enero 26, human sa iyang Suroy-Suroy Sugbo tour.
P5 milyones gikan sa maong kantidad ang gigahin alang sa socio-cultural activities sa lungsod, samtang P400,000 ang ihatag matag usa sa 14 ka contingents nga miapil sa local ug open categories, lakip na ang guest contingents.
Ang kalipay ug pagpasalamat gipadayag ni Carmen Mayor Carlo Villamor ngadto kang Gov. Gwen ug sa Provincial Government, dili lang sa ilang suporta sa pista, kondili usab sa padayon nga pagtabang sa kalambuan sa lungsod.
Kauban ni Gov. Gwen sa maong okasyon sila si Deputy Speaker Duke Frasco, Provincial Board Members Red Duterte, Mike Villamor, Glenn Soco, ug Ako Bisaya Partylist second nominee Carissa Garcia.
Ang Sinulog sa Carmen giila isip lugar diin nahitabo ang pinakaunang Sinulog sa Sugbo, ug kini nagpadayon nga usa ka mahinungdanong selebrasyon alang sa katawhan. (Renante Socia Lada)
(Source: Cebu Provincial Capitol PIO)